افضل أماكن للخروج مع خطيبي في القاهرة

افضل أماكن للخروج مع خطيبي في القاهرة

بعد فترة من الخطوبة والخروجات المُكرره، بنبقى كُلنا عايزين أماكن جديدة عشان نخرج فيها، بعيده عن الروتين وخروجة الكافيهات والمطاعم إللي بيتزهق منها، وعشان كده قررنا نكتبلكم المقال ده عشان ترشحلكم مجموعة من أفضل الأماكن إللي ممكن تروحوها في القاهرة، وفي نفس الوقت هادية وتقدروا تتكلموا فيها وتستمتعوا.

ساقية الصاوي – أفضل مكان للخروج مع للمخطوبين في القاهرة

طبعًا في فترة الخطوبة كل طرف بيكون بيحاول يوفر فلوس عشان مصاريف الجواز والتجهيزات، وبنبقى عايزين مكان حلو، وفي نفس الوت مش غالي عشان نقدر نوفر لما هو أهم، ودي بالظبط مواصفات ساقية الصاوي، إللي تعتبر مكان خرافي تقدر فيه تقعد على النيل وتستمتع وأنت بتسمع الفرق الموسيقى بتغني موسيقى قريبة منك، أو حتى تحضر ندوات وإيفنتات ببلاش، وده كله بتذكرة دخول 20 جنية بس، ومش شرط أنك تشرب أو تطلب حاجة نهائي.

معلومات الوصول والتواصل مع ساقية الصاوي

• العنوان : ساقية الصاوي في شارع أبو الفدا – تحت كوبري 26 يوليو الزمالك
• للدخول على صفحة ساقية الصاوي على خرائط جوجل (دوس هنا)
• مواعيد العمل : كل يوم من 9 الصبح لـ 11 بليل
• رقم تليفنونهم : 01000999995
• للدخول على صفحة ساقية الصاوي على الفيس بوك (دوس هنا)

شارع المعز – مكان للخروج مع خطيبي في القاهرة

شارع المعز هو واحد من أكتر الوجهات السياحية شعبية في القاهرة، هو مكان ممكن تروحه عشان تستمتع بأجواء مصر القديمة، والطراز العتيق، هو مكان ثقافي مفتوح فيه أماكن كتير بيتقدم فيها ندوات موسيقية وشعرية وثقافية مختلفه، ومش غاليه ابدًا، اسعار التذاكر لأي مكان ممكن تدخله هناك بتتراوح ما بين 5 لـ 20 جنية بس!

وكمان ممكن تتصور هناك صور كتير للذكرى، وتشتري تُحن وتذكارات من خان الخليلي، تفكركم دايمًا بالخروجة دي، السؤال دلوقتي هو، إزاي تروح شارع المُعز؟

• صفحة شارع المعز على خرائط جوجل (من هنا)

برج القاهرة – مكان مميز للخروج مع خطيبتك

لو قولتلك أن برج القاهرة من الأماكن المميزة اللي ممكن فيها تقضي وقت حلو فيها مع خطبتك أو مع خطيبك، ممكن تحس أن الكلام تقليدي جدًا، لكن بالعكس، لما تجرب تشوف القاهرة من ارتفاع 187 متر هتلاقي أن الموضوع يستاهل فعلًا، وكمان الموضوع مش متوقف على إنك تشوف القاهرة من فوق وبس لا، أنت ممكن تقعد على المطعم إللي على النيل في البرج وتسمتع جدًا بالخدمة هناك.

معلومات عن برج القاهرة

• مواعيد العمل : كل يوم من 9 الصبح لـ بعد نص الليل
• رقم التليفون : 0227365112
• عدد الادوار : 62 دور
• ارتفاع البرج 187 متر
• تقيم المكان 4.3 من نجوم
• للدخول على صفحة البرج على الفيس بوك (دوس هنا)

حديقة الأزهر – أفضل مكان هادي لخروج المخطوبين في القاهرة

الأزهر بارك هي واحدة من أشهر الحدائق والأماكن إللي الناس بتروحها في القاهرة، وهي حديقة مبنية على مساحة خضراء كبيرة جدًا، وده بيخليها هادية  دايمًا على الرغم من كثرة زوار الحديقة، بالإضافة لأن موقعها مميز جدًا، وسهل الوصول ليها، ولو روحت هناك هتستمتع بأنشطة كتير جدًا، ومناظر خلابة وتقدر تفصلك عن مود الزحمة ودوشة القاهرة.

معلومات الوصول التواصل مع الأزهر بارك

• عنوان الحديقة : طريق صلاح سالم – الدرب الأحمر
• للدخول على صفحة المكان على خرائط جوجل (دوس هنا)
• رقم تليفون المكان : 01144400555
• مواعيد العمل : كل يوم من 9 الصبح لـ 10 بليل
• للدخول على صفحة المكان على الفيس بوك (دوس هنا)
• سعر التذكرة : 25 جنية جميع أيام الأسبوع ماعدا يوم الجمعة 30 جنية.

في النهاية

قدمنا ليكم في المقال ده مجموعة من أفضل الأماكن إللي ممكن تروحها مع خطيبتك أو تخرجي فيها مع خطيبك، وهننتظر رأيكم في الأماكن واقتراحاتكم لأماكن أكتر عشان نضيفها للمقال، ومتنساش تزورنا دايمًا في موقع قالك فين دوت كوم