أفضل أماكن للخروج في المعادي 2022
المعادي واحد من أكتر أحياء القاهرة روقان، وفي أماكن كتير جدًا للخروج وفي منهم أماكن مختلفه جدًا، بعيدًا عن الأماكن المُكرره وإللي بنخرج فيها كل مره، والأماكن دي بالذات إللي عملنا عشانها المقال ده، عشان نرشحلك أماكن مميزة، تخرج وتسهر فيها في المعادي، وتعمل يوم ميتنسيش، جاهز؟
مطعم وكافية Nile point – أفضل مطعم على النيل في المعادي
على الرغم من أن المعادي في مطاعم وكافيهات كتير على النيل، إلا أن المكان ده مُختلف، دايمًا هادي وبتحس فيه بروقان وأنت قاعد، غير أن الخدمة فيه مُمتازة، والحاجات إللي بتتقدم هناك مميزة جدًا، بداية من الأكل المصري مرورًا بالإيطالي واللبناني وغيره وحتى المشروبات، بالإضافة لأن اسعاره مش غالية ابدًا، وعشان كده هو أول مكان بنرشحه للخروج في المعادي، لو عايز خروجه هاديه ومختلفه وكلها روقان.
معلومات الوصول والتواصل مع Nile point
- العنوان : للدخول على صفحة المكان على خرائط جوجل (دوس هنا)
- مواعيد العمل : كل يوم من 9 الصبح لغاية 1 بعد نص الليل
- تقيم الكان : 4.3 من 5 نجوم
- رقم التليفون : 01200003488
- للدخول على صفحة المكان على الفيس بوك (دوس هنا)
سينما جالاكسي المعادي – أماكن للخروج بالمعادي
على الرغم من وجود سينمات في المعادي وأغلبها سينمات كبيرة ومميزة، إلا أن سينما جالاكسي هي واحدة من السينمات صاحبة الاعلى تقيم، وإللي بيروح هناك بيقضي سهرة مُمتعه وبيتبسط فعلًا، وعشان كده كان لازم نحطها في قائمتنا النهارده، لإنها هتضمنلك سهرة سعيدة خاصة لو كانت الخروجة عائلية، أو خروجة هتحتاج فيها تحجز في آخر صف ورا (اتخيل ايموشن بيغمز عشان معندناش في الموقع)
معلومات الوصول والتواصل مع سينما جالاكسي المعادي
- العنوان : أحمد بهجت،، معادي الخبيري الغربية، قسم المعادي، محافظة القاهرة
- التقيم : 4.3
- لمعرفة الأفلام اللي بتعرض في السينما حاليًا (دوس هنا)
The Platform El Maadi – أفضل تجمع مطاعم للخروج في المعادي
هو اكبر تجمع مطاعم وكافيهات على كورنيش النيل في المعادي، المكان مميز جدًا، وهناك هتلاقي أكيد المكان إللي يريحك، مجموعة كبيرة من المطاعم والكافيهات إللي ليهم اسم كبير، وكمان على النيل وبيقدمولك خدمة فوق الممتازة، وبأسعار مش غالية ابدًا في مقابل الخدمة إللي بتاخدها، وعشان كده بنرشحلك المكان ده في المقال، لأن أي كان ذوقك أكيد هتلاقي إللي يعجبك جواه.
معلومات الوصول والتواصل مع بلاتفورم المعادي
- العنوان : كورنيش المعادي – أمام مستشفى السلام الدولي – بجوار نادي مستشاري المحكمة الدستورية
- تقيم المكان : 4.3 من 5 نجوم
- رقم التليفون : 0225287175
- مواعيد العمل : كل يوم من 9 الصبح لـ 12 بليل
- لو عايز تشوف فيديو يعرفك على المكان (دوس هنا)
- للدخول على صفحة المكان على الفيس بوك (دوس هنا)
جراند كافية – أهدى كافية للخروج في المعادي
جراند كافية هو واحد من أشهر الكافيهات في مصر، ومكانه المميز في المعادي، مخليه واحد من أحسن وجهات الخروج إذا كان الهدف كافية، لأنه بيقع قدام الشرطة العسكرية في مكان هادي جدًا ورايق، وكمان المنيو بتاعه مليان أصناف كتيرة جدًا ومتنوعه وبتتقدم بأحسن جودة وشكل مُمكن، وده مخلي الكافية مميز جدًا عن باقي الكافيهات القريبة منه.
معلومات الوصول والتواصل مع جراند كافيه
- العنوان : معادي الخبيري الشرقية، قسم المعادي، الجيزة
- مواعيد العمل : شغال على مدار الـ 24 ساعة
- رقم التليفون : 01019686822
- تقيم المكان : 4.1 من 5 نجوم
- للدخول على صفحة الكافية على الفيس بوك (دوس هنا)
ملاهي فاميلي لاند – أفضل خروجة عائلية في المعادي
ملاهي فاميلي هي مكان من الأماكن اللي أكيد هتروحها يوم من الأيام أنت واسرتك، لو أنت من سكان المعادي، خاصة لو عندك أولاد صغيرين هتكون هي الوجهة الأولى ليك أكيد، لو بتدور على سهرة حلوه ترضي بيها جميع أفراد العائلة، وخاصة وإنها ملاهي مميزة جدًا، وفي أنشطة كتير ممكن تعملها فيه، وكمان اسعرها مش غالية خالص.
معلومات الوصول والتواصل مع ملاهي فاميلي لاند
- العنوان : ابراج عثمان،، كورنيش النيل، معادي الخبيري الغربية، قسم المعادي
- مواعيد العمل : كل يوم من 11 الصبح لـ 11 بليل
- رقم التليفون : 0225248600
- تقيم الملاهي : 4 من 5 نجوم.
- للدخول على صفحة الملاهي على الفيس بوك (دوس هنا)
محمية وادي دجلة – مكان خروج مختلف في المعادي
محمية وادي دجلة من الأماكن القريبة جدًا من المعادي، وإللي ممكن تقضي هناك يوم خرافي، وتاخد مجموعة من الصور العظيمة جدًا في المكان ده، على مساحة 60 كيلو متر تقريبًا، هتلاقي حفريات وتشكيلات صخرية جميلة جدًا، المكان هيكون مميزة لخروجات (شلة الصحاب) خاصة وإنك هتقدر بسهولة تاخد مجموعة صور حلوه جدًا هناك.
معلومات الوصول والتواصل
- العنوان : بوابة معادي – قطامية
- مواعيد العمل : كل يوم من 7 الصبح لـ 6 بليل
- رقم التليفون : 0225256439
- تقيم المكان : 4.5 من نجوم
جراند مول المعادي – أفضل مكان للخروج والتسوق في المعادي
طبعًا لو الخروجة هي خروجة لـ (شلة بنات) فـ هتبقى شووووبينج يا بنتي إنتي بتهزززززري؟
أكيد الشوبينج مع الصحاب ميتفوتش، وعشان كده بنرشحلك جراند مول إللي بيتكون من 5 أدوار، فيهم ملابس وأدوات تجميل لمجموعة من البراندات المصرية والعالمية، أكيد لو روحتوا هناك هتلاقوا حاجات كتير هتعجبكم، وهتقضوا وقت حلو جدًا.
معلومات الوصول لـ جراند مول المعادي
- العنوان : 250 ميدان المعادى جراند مول المعادى, القاهرة بجوار كلية النصر – المعادى
- التقيم : 4.1 من 5 نجوم
- مواعيد العمل : كل يوم من 11 الصبح لـ 11 ونص بليل
- رقم التليفون : 0225195380
- لو عايز تفاصيل كتير عن المول وإللي فيه (دوس هنا)
مُلخص ..
بكده هنكون خلصنا ترشيح لأفضل الأماكن إللي ممكن فيها تقضي خروجة حلوه في المعادي، نتمنى تكونوا استفدتوا من المقال، ومتترددش ابدًا إنك تسألنا أي سؤال في التعليقات، وهنجاوبك فورًا، ولو عايز أي ترشيح لأي مكان تاني، اسألنا وهنرشحلك في (موقع قالك فين)
